Республикалық олимпиаданың облыстық кезеңі өткізілді

2026 жылғы 6–7 қаңтар күндері Халел Досмұхамедұлы атындағы Атырау университетінің базасында Атырау облысы Білім беру басқармасының «Таланттарды анықтау және қолдау орталығы» Қазақстан Республикасы Оқу-ағарту министрлігінің «Дарын» республикалық ғылыми-практикалық орталығының 2025 жылғы 22 желтоқсандағы № 1675/15-11-04 хатына сәйкес 9, 10 және 11-сынып оқушыларына арналған жалпы білім беретін пәндер бойынша Республикалық олимпиаданың облыстық кезеңі өткізілді.

Олимпиада жаратылыстану-математикалық бағыт (математика, физика, химия, биология және т.б.) және қоғамдық-гуманитарлық бағыт (қазақ және орыс сыныптарындағы қазақ тілі, орыс тілі мен әдебиеті, ағылшын тілі, француз тілі, Қазақстан тарихы және т.б.) пәндерін қамтыды.

Аталған іс-шара аясында университеттің кәсіби бағдар беру және маркетинг бөлімдерінің қызметкерлері мектеп басшыларына, пән мұғалімдеріне және 11-сынып оқушыларына арналған ақпараттық-түсіндіру жұмыстарын жүргізді. Оқушыларға университетте жүзеге асырылатын білім беру бағдарламалары, мамандықтар тізімі, оқу шарттары мен қабылдау талаптары туралы жан-жақты мәлімет берілді. Сонымен қатар, университет мамандықтары көрсетілген ақпараттық буклеттер таратылды.

Халел Досмұхамедұлы атындағы Атырау университеті жаратылыстану-математикалық және қоғамдық-гуманитарлық бағыттар бойынша олимпиада жеңімпаздарына Ректор грантын тағайындайды.