Атырау университетінде Нидерланд елшілігінің өкілдерімен кездесу өтті

 Х.Досмұхамедұлы атындағы Атырау университетіне Қазақстандағы Нидерланд Корольдігі Елшілігінің ауыл шаруашылығы мәселелері жөніндегі кеңесшісі Ари Велдхаузен және аграрлық кеңсенің үйлестірушісі Юлия Набатова ресми сапармен келді.

Кездесуге стратегиялық даму және интернационалдандыру жөніндегі проректор Бақыт Алтынбасов, халықаралық ынтымақтастық және интернационалдандыру кеңсесінің басшысы Гүлзира Дәулетова және профессор-оқытушылар құрамы мен студенттер қатысты. 

Кездесу барысында тараптар Қазақстанның ауыл шаруашылығы саласын дамыту, озық технологияларды енгізу және бұл үдерістегі жоғары білімнің рөлін талқылады. Ари Велдхаузен Нидерландтың тұрақты азық-түлік тізбегін дамыту тәжірибесімен бөлісіп, Қазақстанмен ынтымақтастықты кеңейтуге дайын екенін атап өтті.

Сондай-ақ кадр даярлау мәселесіне ерекше назар аударылды. Нидерландта ғылым, техникалық дағдылар және қолданбалы білімді біріктіретін «жасыл білім беру» жүйесі кеңінен қолданылатыны айтылды. «Жас ұрпаққа заманауи ауыл шаруашылығының мансаптық өсу үшін тамаша перспективалары бар жоғары технологиялық сала екенін көрсету өте маңызды», – деді дипломат. Ол сондай-ақ тиімді оқыту дәрісхана аясынан шығуы керектігін, болашақ мамандар тікелей жоғары технологиялық кәсіпорындарда тәжірибеден өтуі қажеттігін айтты. 

Кездесуде қазақстандық агроөнімнің Еуропалық Одақ нарығына экспорттық әлеуеті, өндірістегі цифрландыру, фермерлік шаруашылықтарды заманауи технологиялар арқылы басқару мүмкіндіктері талқыланды. Қонақтар кәсіпорындар арасындағы кооперация мен тәжірибе алмасудың маңыздылығына тоқталып, әйелдерді агроөнеркәсіптік кешенді дамытуға тартуға және қолдауға бағытталған еуропалық «Women in Agriculture» бастамасын атап өтті.

Нидерланд делегациясының сапары университеттің халықаралық ынтымақтастығын нығайтып, білім беру үдерісіне озық тәжірибені енгізуге жаңа мүмкіндіктер ашады.

📷 Дополнительные изображения