Х. Досмұхамедұлы атындағы Атырау университетінде «Экологиялық мәдениет және жастардың экологиялық ағартуы» тақырыбында дөңгелек үстел өтті.
Іс-шараға «Экология» кафедрасының профессор-оқытушылар құрамы мен студенттері қатысып, экологиялық мәдениет пен жастардың қоршаған ортаны қорғаудағы рөлі талқыланды.
Дөңгелек үстел барысында «Экология» кафедрасының меңгерушісі Анар Тлепбергенова жастардың экологиялық жауапкершілігін арттырудың маңыздылығын атап өтті. «Экология» кафедрасының профессоры, PhD Жанар Есенаманова табиғи ресурстарды тиімді пайдалану мен қоршаған ортаны қорғаудың маңыздылығына тоқталды. «Экология» кафедрасының оқытушысы, магистр Жәнібек Тауанов студенттердің экологиялық бастамаларға белсенді қатысуы және практикалық жобаларды жүзеге асыру қажеттігін атап өтті.
Жастар саясаты департаментінің бөлім басшысы Мөлдір Жайлаубайқызы жастардың экологиялық жобаларға белсенді араласуының маңызын атап өтті.
Іс-шара барысында жастардың экологиялық мәдениетін қалыптастыру, экологиялық ағарту, табиғи ресурстар мен биоалуантүрлілікті сақтау, сондай-ақ Атырау облысындағы өзекті экологиялық мәселелер талқыланды. Сонымен қатар студенттердің табиғатты қорғау қызметіне, экологиялық жобалар мен қоғамдық бастамаларға қатысу мүмкіндіктеріне ерекше назар аударылды.
Қатысушылар экологиялық жауапкершіліктің күнделікті өмірде қалай көрініс табатыны туралы пікір алмасты. Су мен табиғи ресурстарды үнемді пайдалану, қалдықтарды азайту, бір реттік пластикті тұтынуды шектеу, жасыл аймақтарды қорғау және қоғамдық орындардың тазалығын сақтау сияқты мәселелер қозғалды.
Кездесу барысында жастардың экологиялық мәселелерді тек теориялық тұрғыдан түсініп қана қоймай, нақты әрекетке көшуінің маңыздылығы атап өтілді. Студенттерге экологиялық бақылау, шағын зерттеулер, сауалнамалар жүргізу, волонтерлік жобаларға қатысу және университет пен қала аумағында жүзеге асыруға болатын экологиялық бастамаларды әзірлеу мүмкіндіктері ұсынылды.
Дөңгелек үстел қорытындысы бойынша қатысушылар экологиялық мәдениет бір реттік акциялармен шектелмеуі тиіс деген ортақ пікірге келді. Ол адамның білімі, жеке жауапкершілігі және күнделікті іс-әрекеті арқылы қалыптасады.
Осындай кездесулер студенттердің экологиялық ойлау жүйесін дамытуға, жастарды өңірдің өзекті мәселелерін талқылауға тартуға және жаңа экологиялық, ғылыми-зерттеу бастамаларының қалыптасуына мүмкіндік береді.
Кездесудің негізгі түйіні — экологиялық өзгеріс қоршаған ортаға саналы көзқарастан және білімді нақты әрекетке айналдырудан басталады.
